Aaj subah subah maine ek khabar padhi ki swargwasi(kuchh news channel ki maane to sadeh abhi bhi prithvi par chalayman) Michael Jackson ko 12 lakh ke tabut mein dafnaya jayega.is tabut ki khasiyat ye hai ki ise banane mein sone ka bharpur istemaal hua hai.
Hamare mohalle ke Ramji uncle ne bhi is khabar ko padha, aur jaisa ki unki prakirti hai jahan bhi lakh ki baat hoti hai,wo us baat mein aranga jaroor lagate hain.
Pahunch gaye subah subah hamara hin bheja kahne,kahne lage-are bhai kya yeh log pagal ho gaye hain jo pahltu mein itna paisa barbad kar rahe hain.
maine kaha,Uncle michael sahab bahut amir aadmi the,aur jab amir marte hain to marte marte bhi apni amiri ki chhaap chod jate hain.
are kya khak amir aadmi the, karoron ka karza le rakha tha unhone.chalo karz toh koi badi baat nahin lekin unki karni bhi toh dekho.kya kya iljam lage the unpe.
hamari baat abhi chal hin rahai thi ki ramkhelawan chacha aate hue dikhe.
ab kya hai ki Ramji aur Ramkhelawanji ki jodi Jai-Veeru jaisi hai,jinki ek mudde par rai nahin banti par paroksh pyar bahut hai.
Aate hin bole-kyon ram kaun si duniya ki kahani lekar baith gaye,aaj khet jotne ke liye Rambaua ko bula lijiye,lagle haath hum bhi jutwa lenge.bahut kaam hai,aaj nahin hua to bhir late ho jaayegi.
aur sunao kya charcha chal rahi hai.
Ramji ne kaha-'dekho bhai kaisa jamana aa gaya hai,apna raamu jo gaon mein shaadi byah mein paani bharta tha aur khane ke siva kuchh nahin leta tha,kitna shanda karecter tha uska,lekin jab mara tab ek lota paani nahin nasib hua,aur ek Michael shab hain jinka tabut hin 12 lakh ka hai,lekin unka karecter jante hain naa aap.'
ramkhelaawan bole-'sab status ki baat hai bhai,unka status jaante hain aap.'
aur bank ka karoro khakar pacha jane walon ki baat hin aisi hoti hai.
Ramji uth khare hue aur bole are humko ek kaam yaad aaya,khet to jotwa lenge lekin khad beej ke liye abhi bank se paisa lana hin bhul gaye'.